قصيدة : ذنب كفك

‏إرسميني لو حلمتي شخص عابر
غاب عنّك في هدوء ، وما تكلّم

يوم حِسّك صار له مدّه . . يكابر
بنهي وصلي طالما وصلك تقلّم

انطفى نورٍ ضواه احساس طاهر
عظّم الله اجر نورك ، يوم ظَلّم

من وفاي ارخصت لجلك كل خاطر
ماحدن يوصل لقدرك من تولّم

لين وقتك غرّك . . . بْـ فتنة مظاهر
ثم طغى الظالم وهو ياما تظَلّم
*
ماقريتي في هدوئي بوح شاعر؟
مالفتك اللي على العينين عَلّم؟

ليه افضفض دام حسّك مايبادر؟
ليه قلبك من سكوتي ما تعلّم؟

‏احتملتك . . لين لملمت المشاعر
خافقي : ما عاد يقوى لو تألّم

ماهو ذنبي ، ما أسلّم يوم اغادر
ذنب كفك ما حفظني يوم سلّم


#خليل_الجابري