قصيدة: حلم الرجوع

مهما سلكت الدرب، حلمي رجوعي،
في داخل احضانك أنا حيل ملهوف

أُمي : يا دفْئي فـ اتساعي وطوعي
ما يوصفك موصوف أو شبه موصوف

يا أول انسانه . . . تبنّت ضلوعي
واول هدوءٍ سَكّن [ العين و الجوف ]

من هو بعد حسّك يخايل دموعي ؟
والمُجتمع لا شاف . . ما كنّه ايشوف

ساهر واسهّر ما بقى من شموعي
و بْـ كل واد بْـ داخلي : هامت حْروف

اتفرّع بْـ حبري ، ولا اْرضى فروعي،
تتفرّع بْـ صوتي [ و ينتابني خوف ]

الناس . . أكثر من تسبّب بـ روعي
والمشكله . . ناسٍ لها ذِكر . . وطيوف

يُمّه : ترى [ ما عاد نوعي بـ نوعي ]
غَيّرتني . . . و اتغيّرت عقبي ظْروف

اللي فَزَع لي ، عـ الأقل سدّ جوعي
في موقفه : بـ اصير لــه غير مألوف

بفديه روحي ، والشرف في طلوعي
دام المواقف هي شرف طالب النوف

واللي يجيني بسْ . . بحزّة ربوعي
بشطب على إسمه، ولو كان معروف

قادر وجازع، يوم عشت بْـ جزوعي
ما له علي غير اكرمه [ دلّـة ضْيوف ]

يُمّه . . ورب البيت ودّي بْـ رجوعي ،
أرجع بحضنك [طفلْ] لك حيل ملهوف


#خليل_الجابري